2024 жылдың 7-8 қарашасында Халықаралық білім беру корпорациясының өкілдері әл-Фараби атындағы Қазақ ұлттық университетінде өткен «Цифрлық шынайылық: картография, ГАЖ және ЖҚЗ саласындағы жаңа сын-қатерлер» атты халықаралық ғылыми-тәжірибелік конференцияға қатысты. Конференция университеттің 90 жылдық мерейтойына арналды.
Халықаралық білім беру корпорациясының атынан құрылыс технологиялары, инфрақұрылым және менеджмент факультетінің оқытушылары – қауымдастырылған профессор, PhD Умирбаева А.Б. және қауымдастырылған профессор Бейсембин Б.Т. белсенді түрде қатысты.
Іс-шараның негізгі мақсаты картография, геоақпараттық жүйелер және Жерді қашықтықтан зондтау салаларындағы өзекті мәселелерді, жаңа үрдістер мен инновациялық тәсілдерді зерттеп, талқылау болды. Конференция ғылыми және тәжірибелік мамандар арасында білім мен тәжірибе алмасуға, сондай-ақ цифрландыру және қарқынды технологиялық прогресс жағдайында заманауи картография мен геоинформатика саласындағы мәселелерді шешудің жаңа тәсілдерін анықтауға бағытталды.
