2025 жылғы 26 мамырда Халықаралық білім беру корпорациясында (KazGASA) мемлекеттік білім беру тапсырысы негізінде оқитын бітіруші курс студенттерімен ақпараттық кездесу өтті. Кездесу спикері — «Қаржы орталығы» АҚ өкілі Тыныбеков Абылай Амангельдиевич.

Кездесу тақырыбы — мемлекеттік грантты міндетті түрде өтеу мәселесі. Студенттерге грант бойынша міндеттемелерді орындау механизмі, заңнамадағы өзгерістер, сондай-ақ олардың құқықтары мен міндеттері түсіндірілді.

Маман оқу ақысын өтеу тәртібі, міндеттемелерді орындау мерзімдері, өтемақыдан босату негіздері, ресми жұмысқа орналасуға қойылатын талаптар мен өтеу тетіктері туралы кеңінен баяндады. Практикалық мәселелерге де ерекше назар аударылды: қажетті құжаттар тізімі, тапсыру рәсімдері, өңірлік коэффициенттерді есепке алу және кейінге шегеру жағдайлары.

Қатысушылар өздерін қызықтырған сұрақтарға жауап алып, нақты жағдайлар бойынша жеке кеңес алды.