Без рубрики – Международная Образовательная Корпорация

ХБК профессоры академик Найля Базанова атындағы марапатқа ие болды

2025 жылдың 6 наурызында Халықаралық білім беру корпорациясы сәулет факультетінің профессоры, сәулет докторы Гульнара Сейдахметовна Абдрасилова академик Найля Базанова атындағы құрметті төсбелгімен марапатталды. Салтанатты марапаттау рәсімі Қазақстан Республикасының Президенті жанындағы Қазақстан Республикасының Ұлттық ғылым академиясында Халықаралық әйелдер күні қарсаңында өтті.

Іс-шараға ғылым саласында жұмыс істейтін 400-ге жуық әйел қатысты. Биыл бұл беделді марапатқа 48 жетекші маман лайық деп танылды. Қазақстан мен Орталық Азиядағы тұңғыш әйел академиктің құрметіне тағайындалған бұл сыйлық еліміздің ғылыми әлеуеті жоғары, айрықша жетістіктерге жеткен көрнекті әйел-ғалымдарына беріледі.

Халықаралық білім беру корпорациясы Гүлнара Сейдахметқызын жоғары марапатымен құттықтай отырып, ғылыми және педагогикалық қызметінде толағай табыстар тілейді!

06.03.202507.03.2025

Халықаралық білім беру корпорациясының туы Килиманджаро шыңында!

Халықаралық білім беру корпорациясы енді тек білім шыңдарын ғана емес, әлемнің ең биік нүктелерін де бағындыруда!

5 895 метр биіктікте, Килиманджаро шыңында Халықаралық білім беру корпорациясы туы желбіреді! Бұл іске ХБК Қамқоршылық кеңесінің мүшесі Ильяс Жангаскин және ХБК серіктесі Темиржан Абдрахманов қол жеткізді, олар әйгілі африкалық шыңды бағындырды.

Бұл қадам – биіктерге ұмтылу, шекараларды еңсеру және білім беру қауымдастығының бірлігін білдіреді. Осындай шабыттандыратын әрекеті үшін ХБК серіктестеріне зор алғысымызды білдіреміз!

04.03.202507.03.2025

MOK FUSION 2025

MOK FUSION 2025 Халықаралық білім корпорациясының студенттерін, оқытушыларын және қызметкерлерін біріктіріп, олардың музыка, би, әдебиет және сахна өнері саласындағы таланттарын көрсетуіне бірегей мүмкіндік берді.

Шараның ашылуы Әлеуметтік даму департаментінің директоры Дусипова Турсынай Сағидоллақызының әсерлі өнерімен басталды. Қазылар алқасы қатысушылардың жоғары дайындық деңгейін, ерекше қойылымдарын және шығармашылық нөмірлерді ашудағы стандарттан тыс тәсілдерін атап өтті. Әсіресе, қазылар қатарында ҚазБСҚА түлектерінің болуы ерекше мәнге ие болды, себебі олар кезінде оқытушыларынан баға алса, енді өздері ұстаздарының өнерін бағалады.

MOK FUSION 2025 жеңімпаздары

1-орын (1 000 000 тг) – Тюленов Мухаммед Махмуджанович пен Урисова Алтынай (ҚазБСҚА колледжі)
2-орын (600 000 тг) – Марденова Лейла Қалқаманқызы мен Малгаждар Амина Рамазанқызы (ҚАУ мектебі)
3-орын (400 000 тг) – Умирбаева Алия Батухановна мен Қыраубаев Әулет (ФСТИМ)

Байқау бағдарламасынан бөлек, сахнада GASA Fusion және Life Band Saulet студенттік ұйымдары өнер көрсетті, сондай-ақ UniQueens чирлидерлік командасы өздерінің дебюттік шоуын ұсынып, іс-шараның көркін аша түсті.

MOK FUSION 2025 өнердің шекарасыз екенін тағы бір мәрте дәлелдеді! ХБК студенттері, оқытушылары және қызметкерлері өз таланттарын көрсетіп, көрермендерге ерекше жарқын әрі әсерлі кеш сыйлады.

28.02.202507.03.2025

KAZGASA SCHOOL оқушылары Америкада жеңіске жетті

KAZGASA SCHOOL командасы АҚШ-тың Лос-Анджелес қаласында өткен халықаралық USEF Robo Tourney турнирінде жарқын жеңіске жетті. Оқушылар жоғары дайындық деңгейін, инновациялық тәсілдерін көрсетіп, Soccer Bot санатында алтын медаль жеңіп алды.

Жарысқа 12 елден келген командалар қатысып, автономды футбол ойнай алатын роботтар әзірледі. Бұл қатысушылардан бағдарламалау мен инженерия саласындағы терең білімді, стратегиялық ойлауды және өзгермелі ойын жағдайларына жылдам бейімделу қабілетін талап етті.

KAZGASA SCHOOL жеңісі оқушылардың робототехника саласындағы жоғары әлеуетін, әлемдік деңгейде бәсекеге қабілеттілігін және озық технологияларды дамытуға қосқан үлесін дәлелдейді.

Жеңімпаздарды және олардың жетекшілерін лайықты жетістіктерімен құттықтаймыз! Ғылым мен инженерия саласындағы жаңа табыстарға жете берулеріңізге тілектеспіз!

24.02.202528.02.2025

Патрик Шумахер ХБК-да қонақ дәрісін өткізді

2024 жылғы 21 ақпанда Халықаралық білім беру корпорациясына (ҚазБСҚА) заманауи сәулет өнерінің жетекші жаңашылдарының бірі, Zaha Hadid Architects (ZHA) компаниясының басшысы және бас сәулетшісі Патрик Шумахер келді. Сапар аясында танымал сәулетші қайта жаңғыртудан өткен ҚазБСҚА ғимаратымен, digital-музейімен және мамандандырылған зертханаларымен танысты.

Патрик Шумахер – цифрлық технологиялар мен алгоритмдік жобалауға негізделген сәулет бағыттарының бірі параметризмнің негізін қалаушы. Оның басшылығымен ZHA Бакудегі Гейдар Әлиев орталығы, Лондондағы Олимпиадалық су спорты орталығы, Бейжіңдегі Дасин халықаралық әуежайы сынды бірқатар әлемдік деңгейдегі жобаларды жүзеге асырды.

Сапардың маңызды бөлігі сәулетшілер мен дизайнерлерге, ҚазБСҚА серіктестеріне, оқытушылар мен студенттерге арналған қонақ дәрісі болды. Бұл Патрик Шумахердің Қазақстандағы алғашқы баяндамасы болып, жаһандық деңгейдегі озық сәулет идеяларымен танысуға бірегей мүмкіндік ұсынды.

Дәріс барысында сарапшы XXI ғасыр сәулетінің негізгі үрдістері, жобалаудың инновациялық әдістері және қала құрылысына жасанды интеллектті енгізу тақырыптарын қозғады. Қатысушылар ZHA-ның үздік жобаларымен танысып, сәулеттің цифрлық трансформациясын талқылап, әлемдік деңгейдегі жетекші сәулетшіге сұрақтар қою мүмкіндігіне ие болды.

Дәрістен кейін Патрик Шумахер журналистердің сұрақтарына жауап берген баспасөз конференциясы өтті. Кездесу барысында Алматы қаласының экологиялық мәселелері, қала құрылысының даму перспективалары және сәулет трендтері талқыланды. Ол өзінің кәсіби тәжірибесімен бөлісіп, Қазақстандағы сәулет жобаларын дамыту бойынша ұсыныстарын айтып, Алатау қаласының жобасына ерекше тоқталды. Сәулетші өңірдің жоғары әлеуетін атап өтіп, болашақта Қазақстанда Zaha Hadid Architects жобасын жүзеге асыру мүмкіндігін жоққа шығармайтынын жеткізді.

Патрик Шумахердің сапары Қазақстанның академиялық және кәсіби сәулет қауымдастығы үшін маңызды оқиғаға айналып, әріптестік пен білім алмасудың жаңа көкжиектерін ашты.

21.02.202524.02.2025

Эдриан Добсонның ХБК-ға сапары

2025 жылдың 21 ақпанында Халықаралық білім беру корпорациясына (ҚазБСҚА) Корольдік британдық сәулетшілер институтының (RIBA) атқарушы директоры Эдриан Добсон келді.

Сапар барысында ол оқу корпусы, мамандандырылған зертханалар және ЮНЕСКО кафедрасымен танысты. Одан кейін сәулет факультетінің оқытушыларымен кездесу өтіп, ХБК (ҚазБСҚА) пен RIBA арасындағы ынтымақтастықтың перспективалары, соның ішінде RIBA аккредитациясын алу мүмкіндігі талқыланды.

Сапар соңында Эдриан Добсон Патрик Шумахердің дәрісіне қатысып, сәулет және қала құрылысы саласындағы халықаралық тәжірибе алмасудың маңыздылығын атап өтті.

21.02.202528.02.2025

Халықаралық білім корпорациясы мен University for the Creative Arts өзара түсіністік туралы меморандумға қол қойды

2025 жылғы 20 ақпанда Халықаралық білім корпорациясы (ҚазБСҚА) мен University for the Creative Arts (UCA) UK Future Places форумының аясында өзара түсіністік туралы меморандумға қол қойды. Бұл қадам Ұлыбритания мен Қазақстан арасындағы білім беру байланыстарын нығайтудағы маңызды кезең болмақ.

UCA – өнер, дизайн және креативті индустриялар саласындағы Ұлыбританияның жетекші мамандандырылған университеттерінің бірі. Ол осы серіктестік аясында инновациялық білім беру әдістері мен технологияларын енгізетін болады. Кентербери, Эпсом, Фарнхэм және Maidstone TV Studios кампустары бар UCA ХБК (ҚазБСҚА) студенттеріне академиялық алмасу бағдарламаларына қатысу мүмкіндігін ұсынады. Сондай-ақ, UCA-ның заманауи VR зертханаларына, анимация студияларына және 3D дизайн кешендеріне қолжетімділік қазақстандық студенттерге жаңа технологияларды игеруге және оларды креативті индустрияға енгізуге мүмкіндік береді.

Осы серіктестік аясында UCA ХБК-да (ҚазБСҚА) франшизалық білім беру бағдарламасын іске қосуды жоспарлап отыр. Ол бес халықаралық деңгейде мойындалған бакалавриат бағдарламасын ұсынады: Өнеркәсіптік дизайн, Интерьер дизайны, Бизнес және менеджмент, Цифрлық маркетинг және әлеуметтік медиа, сондай-ақ Графикалық дизайн. Жақында UCA Академиялық серіктестік комитеті бұл жобаны қарастырды, және қазіргі уақытта серіктестік келесі кезеңге – валидация процесіне өтуде. Бұл кезеңде UCA академиялық комиссиясы мен сыртқы сарапшы бағдарламаның барлық егжей-тегжейін пысықтап, оны UCA-ның академиялық стандарттарына сәйкестігін тексереді.

Қол қойылған меморандум студенттерге креативті индустриялар саласында озық білім алу мүмкіндігін ашып, білім беру саласындағы халықаралық серіктестікті нығайтуға жол ашады.

20.02.202524.02.2025

Charterhouse School өкілдерінің Халықаралық білім корпорациясына сапары

2025 жылдың 17–18 ақпанында Халықаралық білім беру корпорациясы Ұлыбританиядағы Charterhouse School делегациясын қабылдады, оның құрамында халықаралық білім беру жөніндегі директор Карэн Девис болды.

Сапар аясында қонақтар үшін корпорацияның білім беру мекемелеріне, соның ішінде ҚазБСҚА және ҚАУ мектептеріне, сондай-ақ жаңартудан өткен ҚазБСҚА ғимаратына экскурсия ұйымдастырылды.

Кездесудің негізгі мақсаты – мектепті дамыту бойынша алдағы жоспарларды талқылау және білім беру саласындағы ынтымақтастықтың перспективаларын қарастыру болды.

18.02.202524.02.2025

Италия делегациясы ХБК-ға итальяндық дизайн күні аясында келді

2025 жылғы 12 ақпан халықаралық итальяндық дизайн күні аясында ХБК-ға (ҚазБСҚА) Италия делегациясы келді. Делегация құрамына Италия Республикасының Қазақстандағы елшілігінің уақытша сенімді өкілі Аниелло Петито, Италия мәдениет орталығының директоры Эдоардо Крисафулли, Италияның Сауда агенттігінің директоры Мартино Кастеллани және Қазақстандағы итальяндық дизайн елшісі Сальваторе Амура кірді.

Кездесудің маңызды бөлігі Сальваторе Амураның «Теңсіздікті еңсеру: жақсы өмір сүруге арналған дизайн» тақырыбындағы қонақтық дәрісі болды. Өз баяндамасында ол итальяндық дизайнның заманауи үрдістерін таныстырып, оның жайлы және инклюзивті қалалық ортаны құруға ықпалын баяндады.

17.02.202517.02.2025

ХБК басшылығы Алматылық желдеткіш зауытына барды

2025 жылғы 12 ақпанда Халықаралық білім корпорациясының басшылығы Алматылық желдеткіш зауытына барды. Бұл зауыттың бас директоры – ҚазБСҚА түлегі Марат Баккулов. Ол өзінің кәсіби жолын академияда оқытушы болып бастап, кейін инженерлік салада үлкен жетістіктерге жетті.

Алматылық желдеткіш зауыты – саланың жетекші кәсіпорындарының бірі. Өндірістік процестер толықтай автоматтандырылған және роботтандырылған, қауіпсіздікке ерекше көңіл бөлінеді. Зауыт өнімдері азаматтық инфрақұрылымда және мұнай-газ саласында кеңінен қолданылып, белсенді түрде экспортталады.

Кездесу барысында ХБК (ҚазБСҚА) мен кәсіпорын арасындағы өзара ынтымақтастық мәселелері талқыланды. Атап айтқанда, өз білімдерін іс жүзінде сәтті қолданып жүрген түлектерді жұмысқа орналастыру, студенттердің заманауи технологияларды меңгеруге бағытталған өндірістік тәжірибеден өтуі, сондай-ақ оқу процесін нақты өндірістік міндеттермен ықпалдастыру мақсатында дуалды білім беруді енгізу сұрақтары қарастырылды. Сонымен қатар, ХБК (ҚазБСҚА) базасында жылу-газ желдету саласы бойынша мамандар даярлайтын зертхана құру бастамасы көтерілді.

ХБК (ҚазБСҚА) өнеркәсіптік кәсіпорындармен байланысын нығайтып, студенттер мен түлектерге кәсіби даму мен практикалық білім алуға кең мүмкіндіктер ұсынуды жалғастыруда.